ನಗರದ ಗೀತಾಂಜಲಿ ಸಿಲ್ಕ್ಸ್ ರಸ್ತೆಯಲ್ಲಿ ಸಾವಿರಾರು ರೆಕ್ಕೆ ಗೆದ್ದಲುಗಳು ಏಕಕಾಲದಲ್ಲಿ ಹಾರಾಡಿದ್ದು, ಸಾರ್ವಜನಿಕರ ಗಮನ ಸೆಳೆಯಿತು.
ರಸ್ತೆಯ ಇಕ್ಕೆಲಗಳಲ್ಲಿರುವ ಅಂಗಡಿಗಳ ವಿದ್ಯುತ್ ದೀಪ ಹಾಗೂ ದಾರಿದೀಪಗಳಿಗೆ ಆಕರ್ಷಿತಗೊಂಡ ಗೆದ್ದಲುಗಳು ಗುಂಪು ಗುಂಪಾಗಿ ಹಾರಾಡಿದವು. ಕೆಲ ಸಮಯದ ಬಳಿಕ ರೆಕ್ಕೆಗಳನ್ನು ಕಳಚಿಕೊಂಡ ಗೆದ್ದಲುಗಳು ಹಾಗೂ ಸಾವಿರಾರು ರೆಕ್ಕೆಗಳು ದೀಪಗಳ ಕೆಳಗೆ ಮತ್ತು ರಸ್ತೆಯಂಚಿನಲ್ಲಿ ಕಂಡುಬಂದವು.
ಮಳೆ ಹಾಗೂ ತೇವಾಂಶದ ವಾತಾವರಣದ ಬಳಿಕ ಗೆದ್ದಲುಗಳ ಕಾಲೋನಿಯಿಂದ ಸಂತಾನೋತ್ಪತ್ತಿ ಹಂತದಲ್ಲಿರುವ ರೆಕ್ಕೆ ಗೆದ್ದಲುಗಳು ಹೊರಬಂದು ಗುಂಪಾಗಿ ಹಾರಾಡುವುದು ಸಾಮಾನ್ಯ. ರಾತ್ರಿ ವೇಳೆ ಬೆಳಕಿನತ್ತ ಆಕರ್ಷಿತವಾಗುವ ಇವುಗಳಲ್ಲಿ ಜೋಡಿಗಳು ಸೂಕ್ತ ಸ್ಥಳ ಆಯ್ಕೆ ಮಾಡಿಕೊಂಡು ಹೊಸ ಕಾಲೋನಿ ಸ್ಥಾಪಿಸುತ್ತವೆ.
ಮಳೆಗಾಲದಲ್ಲಿ ಕಂಡುಬರುವ ಈ ‘ಟರ್ಮೈಟ್ ಸ್ವಾರ್ಮಿಂಗ್’ ಗೆದ್ದಲುಗಳ ನೈಸರ್ಗಿಕ ಸಂತಾನೋತ್ಪತ್ತಿ ಚಕ್ರದ ಪ್ರಮುಖ ಹಂತವಾಗಿದ್ದು, ಪರಿಸರದಲ್ಲಿ ಸಹಜವಾಗಿ ನಡೆಯುವ ಪ್ರಕ್ರಿಯೆಯಾಗಿದೆ ಎಂದು ಕೀಟ ತಜ್ಞರು ತಿಳಿಸಿದ್ದಾರೆ.
